السلام عليكم جميعا
بدون مقدمات
فيه مشكلة بيقع فيها اغلب شباب كتاب السيناريو
وخصوصا في فترة البدايات اثناء الشباب
@ قول !
وهي انهم يكتبوا فيلم او مسلسل ويعانوا فيه
ويظلوا متمسكين بانه العمل الافضل في الكون
ويجروا هنا وهنا بيه سنه واتنين وعشره
وفي النهاية عادة لا يصلون الى شئ ؟!!!
@ما تفقرش فيها مش ناقصاك والنبي !
ده حقيقي اسمع بس .. لان اولا السيناريو وحرفيته تثقل بالممارسة
فلازم تكتب عمل واتنين وتلاته وعشرة
وتغير في ده وترجع لده
وترمي ده في الزبالة او تعمله بكل بساطه ديليت
وان كنت افضل ان يبقى عندك فولدر ع الكمبيوتر
تحط فيه اي شئ تشوف انه زبالة
@ليه يا أخويا ؟
لانك ممكن في يوم من الايام ترجع له وتلاقيه حاجة تانيه
وتحط مكانه حاجات تانية كتير كنت شايف انها برفكت
يبقى ده اول هام ......
تكتب مرة واتنين وعشره وابدأ بحاجات بسيطه
يعني فيلم روائي قصير ..
سهره دراميه 40 دقيقة
وجرب ده وده مسرح واذاعة
اللي كتير بيتكبروا عليها ويقولوا
@دي يا عم ما تجيبش همهاااااااااااااااااا
فعلا وانا معاك
بس فيه مشكلة ان همها ده بيخليك تمام ومتفوق على ناس تانية كتير
لما تطلع للي بيجيب همه
@ ازاي ؟ افتي يا مفتي ؟
الاذاعة .. ميديا عمياء ..
تعتمد على الصوت فقط في توصيل الفكرة والرسالة
وهي اصعب فن كتابة في الدنيا ..
لو أجدته بصفة مبدئية يبقى .. الليلة حتبقى تمام معاك
على مستوى الحوار بالذااااااات
وازاي تكتب حوار واقعي وف نفس الوقت حرفي وموجه صح
والمسرح كمان .. يا سلاااااااااااااااااام ابو الفنون
بيخليك تقدر ازاي تسيطر على شخصياتك في اطار مكاني محدود
مش بس خشبة المسرح
ولكن بردوا في اطار مشاهد قليلة
لانك مش حتقدر تبقى مثلا في اوضه نوم ع المسرح
وبعد سطرين تبقى في الشارع او الصالة
بتتدرب على انك تسيطر ..
على الحوار والصوره .. شفت الترتيب ازاي .. الاول اذاعة .. صوت بس ..
وبعدين صورة وصوت ..
@@ وبعدين ف وجع الدماغ اللي انت فلقتنا بيه ده ؟ انجز !!!
يا سيدي استنى بس
خدى مني الكلام
@ قول يا عم الحاج!
الليلة بكل بساطه ان حضرتك
تبدأ طبقا لسياسه الباب المفتوح
بانك تشوف ايه المتاح ادامك وشوط فيه على طول
يعني لو ليك سكه في ناس بتوع مسرح يعملوا لك مسرحيه صغيره
شوط !
لو ليك سكه روائي قصير ديجيتال تلعب فيه انت واصحابك
شوط !
لو عندك سكه للاذاعة .. اديها ...
ولو كل ده عندك شوط فيه
@ واشمعنى يعني دول اللي جبت سيرتهم .. ما نقتش غير اللي ما حدش بيعبرهم .
شوف الواد !
يا ابني اللي مش بيعبرهم الناس العادية بشكل جزئي
لكن الفنانين والمنتجين والمخرجين بيهتموا جدا جدا جدا بده
عشان بيطلع منهم مواهب ..
@تصدق صح !!
الحمد لله انه فهم .
@بتقول ايه يا عم انت ؟
ولا حاجة .. المهم
انك حتتحقق حاجات كتير .. حتتدرب..
حتعمل سيرة ذاتيه ليك .
وغير كده فيه مهرجانات مسرح وافلام قصيرة بالهبل
بره مصر وجواها
@ حلو الحكاية دي !
طب الحمد لله اسيبك بقه عشان ما يجليش بارانويد بدري
@ اتوكل على الله .... ولا حموووووو .. هات العيال عشان يشتغلوا ف ورشة اذاعة
حسبي الله ونعم الوكيل فيك !
شكرا ليكم جميعا وبالتوفيق انشاء الله
وافتكر .. كرامتك قبل اي شئ في التعامل في المجال ده
الكاتب / هانى عادل
موضوع: الغلطة اللي بيقع فيها اغلب شباب كتاب السيناريو ( ومبدأ الباب المفتوح) 
الأربعاء مايو 11, 2011 5:23 pm
